پورٹل امام خمینیؒ کویتی حکومت کی جانب سے امام خمینیؒ کو ملک میں داخلے سے روکنے کے بعد آپ نے کسی دوسرے ملک جانے کا فیصلہ کیا، جس کے نتیجے میں فرانس آپ کی ہجرت کا مرکز بنا۔ نجف اشرف میں امامؒ کے قریبی ساتھی حجۃ الاسلام والمسلمین محمدرضا ناصری نے فرانس کے انتخاب کی وجوہات بیان کرتے ہوئے کہا:
’’پیرس کے انتخاب کی بنیادی وجہ یہ تھی کہ وہاں داخلے کے لیے ابتدا میں ویزے کی ضرورت نہیں تھی۔ اس کے برعکس یورپ یا امریکا کے کسی بھی دوسرے ملک کا انتخاب کرتے تو ہمیں بغداد ہی میں اس کا ویزا حاصل کرنا پڑتا، جس کے لیے وقت لینا اور ویزے کے حصول کے مسائل درپیش ہوتے۔
’’کویت کا ویزا ہمارے پاس موجود تھا، لیکن اس کے باوجود ہمیں وہاں داخلے کی اجازت نہیں دی گئی۔ ممکن تھا کہ یہ ملک ویزا ہونے کے باوجود ہمیں داخل نہ ہونے دیتا۔ دوسری جانب یہ امکان بھی تھا کہ ایرانی حکومت اس پر ردعمل ظاہر کرتی۔ ان حالات میں فرانس کا یہ فائدہ تھا کہ وہاں پہنچنے کے لیے ویزا درکار نہیں تھا اور دس روز تک بغیر ویزے قیام کیا جا سکتا تھا، اس لیے کوئی ہمیں روک بھی نہیں سکتا تھا۔ یوں ہمارے پاس دس دن کا وقت تھا کہ ہم اطمینان کے ساتھ فرانس یا کسی دوسرے ملک میں تین ماہ کے قیام کا ویزا حاصل کر لیتے۔
’’فرانس کا ایک اور فائدہ یہ تھا کہ وہاں ہمارے بہت سے دوست موجود تھے۔ حاج احمد آقا نے فرانس میں ٹیلی فون پر رابطہ کیا اور انہیں وہاں جانے کے فیصلے سے آگاہ کیا۔
’’فرانس کے انتخاب کا ایک سبب یہ بھی تھا کہ اس وقت وہاں ژیسکاردستن صدر تھے، جن کے دور میں فرانس نسبتاً زیادہ آزاد اور انقلاب کے لیے زیادہ سازگار تھا۔
’’ایک اور پہلو، جسے شاید خداوند تعالیٰ نے مقدر کر رکھا تھا، یہ تھا کہ اس واقعے سے چند ماہ قبل فرانسیسی اخبار لوموند کا ایک صحافی نجف آیا تھا اور اس نے حضرت امامؒ کا انٹرویو کیا تھا۔ یہ انٹرویو شائع ہونے کے بعد پیرس سمیت فرانس بھر میں بڑے پیمانے پر زیرِ بحث آیا اور اس کے نتیجے میں حضرت امامؒ ایک معروف شخصیت بن چکے تھے۔
’’یہاں تک کہ فرانس کے بعض کمیونسٹ اور سوشلسٹ کمیونسٹ حلقوں سے بھی ہمیں ٹیلی فون آتے تھے۔ وہ کہتے تھے کہ ہمیں معلوم نہیں تھا کہ حضرت امامؒ کے نظریات اتنے بلند اور اعلیٰ ہیں۔ یہ انٹرویو فرانس میں خاصا مقبول ہوا تھا۔
’’ان تمام حالات نے مل کر فرانس کے انتخاب کی راہ ہموار کی اور اسی وجہ سے اسے ترجیح دی گئی۔
’’حاج احمد آقا نے فرانس میں موجود دوستوں سے ٹیلی فون پر رابطے کے دوران پیرس میں قیام گاہ کے حوالے سے حضرت امامؒ کی خواہش بھی بتائی۔ امامؒ نہیں چاہتے تھے کہ وہ کسی کی ذاتی یا نجی رہائش گاہ میں قیام کریں۔ ان کی خواہش تھی کہ ایک ایسا مکان حاصل کرکے کرائے پر لیا جائے جو کسی کی ذاتی ملکیت یا رہائش نہ ہو۔
’’ابتدا میں آقای صداقی کے گھر کا انتخاب کیا گیا، تاہم اس وقت تک میں پیرس نہیں پہنچا تھا۔ بعد ازاں امامؒ نوفل لوشاتو منتقل ہوگئے اور میں وہاں ان کے ساتھ جا ملا۔