مؤسسۂ تنظیم و نشر آثار امام خمینیؒ کے سربراہ ڈاکٹر علی کمساری نے شہید آیت اللہ سید مصطفیٰ خمینیؒ کی علمی، فکری اور سیاسی شخصیت پر روشنی ڈالتے ہوئے کہا کہ وہ ایسے ممتاز عالم تھے جنہوں نے دینی علوم، سیاسی جدوجہد اور سماجی ذمہ داری کو اپنی زندگی میں یکجا کیا۔
ڈاکٹر کمساری کے مطابق، شہید سید مصطفیٰ خمینیؒ کی شخصیت کے تین نمایاں پہلو تھے: علمی استقلال اور اجتہادی بصیرت، مختلف دینی علوم میں گہری مہارت، اور امام خمینیؒ کی تحریک کے ساتھ سیاسی و سماجی جدوجہد۔ انہوں نے علمی میدان میں اپنے اساتذہ سے استفادہ کرنے کے باوجود مستقل فکری موقف اختیار کیا اور اصولِ فقہ و تفسیر سمیت مختلف شعبوں میں قابلِ قدر علمی آثار چھوڑے۔
انہوں نے شہید مصطفیٰ خمینیؒ کی علمی خدمات کا ذکر کرتے ہوئے کہا کہ ان کا اندازِ فکر محض نظری مباحث تک محدود نہیں تھا، بلکہ وہ قرآنی تعلیمات کو معاشرتی ذمہ داری اور انسانی مسائل سے مربوط کرتے تھے۔ ان کی علمی زندگی میں نجف اشرف کے حوزۂ علمیہ کا بھی اہم کردار رہا، جہاں انہوں نے اعلیٰ سطح کے دروسِ اصول پیش کیے اور علمی حلقوں میں نمایاں مقام حاصل کیا۔
ڈاکٹر کمساری نے مزید کہا کہ شہید سید مصطفیٰ خمینیؒ نے پہلوی حکومت کے خلاف امام خمینیؒ کی جدوجہد میں اہم کردار ادا کیا۔ امام خمینیؒ کی جلاوطنی کے بعد انہیں بھی گرفتار کرکے جلاوطن کیا گیا، تاہم انہوں نے نجف اشرف میں سیاسی و سماجی روابط برقرار رکھنے اور تحریک کے تسلسل میں اپنا کردار جاری رکھا۔
انہوں نے شہید مصطفیٰ خمینیؒ کی اچانک وفات اور اس کے بعد ہونے والی تعزیتی تقریبات کے سیاسی و سماجی اثرات کا ذکر کرتے ہوئے کہا کہ ان کی شہادت نے عوامی جذبات کو گہرائی سے متاثر کیا اور امام خمینیؒ کی تحریک کے لیے ایک اہم موڑ ثابت ہوئی۔
ڈاکٹر کمساری کے مطابق، شہید سید مصطفیٰ خمینیؒ کی زندگی سے آج بھی علمی خودمختاری، دینی علوم میں جامعیت، معاشرتی مسائل کے حوالے سے شعور اور علما کی اجتماعی ذمہ داری جیسے اہم اسباق حاصل کیے جا سکتے ہیں۔ انہوں نے قم اور نجف کے حوزہ ہائے علمیہ کے درمیان تعاون اور اتحاد کو مضبوط بنانے کی ضرورت پر بھی زور دیا۔
آخر میں ڈاکٹر کمساری نے ایران کے خلاف امریکہ اور صیہونی حکومت کی جنگ و جارحیت اور ایران کے رہبر کی شہادت کے تناظر میں بیداری، بصیرت، اتحاد اور ظلم کے مقابلے میں استقامت کی ضرورت پر زور دیا۔